我的確被人煽動

佔中案結束，先係九人被判罪成。其實被捕嘅有上千人，好多係民主派中熟悉嘅名字。林鄭政府會唔會再提出其他控告，我相信會睇下香港人對今次案件嘅反應。眼見周圍嘅人對件事不聞不問，情況絕對唔樂觀。

當日去金鐘，我諗好多人絕唔係因為佔中三子嘅號召。佢地雖然係好人，但係太膠，缺少左魅力。九二八上街係因為中共反口覆舌，831落閘拒絕比香港人真普選嘅決定。係因為死差佬捉左幾個學生仲要玩佢地。我好記得當日有報導話差人拉左黃之鋒後，帶佢番佢屋企，然後將佢D高達模型一件一件拆開話要搜證。點解"人民公僕”行為可以咁仆街？係因為果87個向和平示威者發射嘅摧淚彈。係因為梁振英條PK咀臉太衰。大家睇唔過眼，所以行出泥。

煽惑他人煽惑公眾妨擾罪即係點？聽個名都頭暈。據說呢條係英國留下嘅惡法。英國人冇用過。其他普通法地方都廢左條例。特區政府翻箱倒櫃搵出呢條例泥告九人，十分費心。邊個人「煽惑」香港人行出泥？真係佔中三子大聲高呼、高舉雙手，就引來過百萬人？咁係高估佢地影響力。冇梁振英、冇中共、冇曾偉雄，係冇可能會有咁多人。要拉人煽動，應該拉佢地，我會行出來做證。

我敬佩九子，同埋其他因為佔中而被捕嘅人。我唔理佢地係唔係左膠、係唔係真本土，屬於泛民邊個陣營，我都好感激佢地為香港付出。佢地放棄高薪、放棄安定生活、甚至放棄自由。佢地唔係為個人利益，而係真心咁關心同緊張香港，唔希望香港環境繼續惡化（大6化）落去。我相信佢地明白後果，並有犠牲準備。眼見好多香港人係好自私，只顧自己賺錢而對香港環境轉變不聞不問。呢班人如果有子女，有一日子女問佢地為香港爭取過乜嘢，我希望佢地有面目回答。

藍色陣營成日話佔中三子鼓勵年輕人去死。又成日話佔中係外國勢力參與。林鄭話有法例就可以提告。我想話就我所知所見都唔係事實。佔中從商討日開始，戴耀延只係呼籲中、老年人而唔鼓勵年輕人參加。佢認為中年人享受左英治時期嘅好處，應該為下一代著想付出。而佢係身體力行咁去做，唔係好似有D人只係狗up。佔中由外國勢力策動係笑話，因為到過現場嘅人就會感受大家都係自發嘅。林鄭話有法例就可以提告，說法好人治好中國。而家中國政府正正就係以各式各樣嘅罪名加諸係抗爭者身上，難道林鄭認為中國法治好好？同年台灣有太陽花學運，所有被捕者都係無罪釋放。我覺得呢個就係民主社會，同獨裁社會嘅分別。

我寫咁多係想講下對佔中感受，同埋好似為九子做D野。當感謝佢地又好，當為我仍然能夠自由自在咁生活而佢地將要失去自由表達愧意又好。眼見認識嘅人都好似唔多理會唔多緊張，其實都好氣餒。自己好似生活係另一個星球，又或者係平衡時空。法院會係24日判刑，希望佢地全都獲得輕判，甚至無罪釋放。不過今時今手嘅香港，應該係一種幻想。